Münaqişələrin idarə olunması

Münaqişələr düzgün şəkildə idarə olunmadıqda, işçi münasibətlərinin pozulmasına, yaradıcılığın və məhsuldarlığın azalmasına, hətta maliyyə resurslarının boşa xərclənməsinə səbəb ola bilər. Münaqişələrdən tamamilə yayınmaq mümkün deyil. Amma seçim bizimdir: ya bu qarşıdurmaların münasibətlərə mənfi təsir göstərməsinə yol veririk, ya da onları dəyişiklik üçün təkanverici bir fürsətə çeviririk.

Bu isə ilk növbədə münaqişələrin mahiyyətini daha dərindən anlamaqdan və effektiv münaqişə idarəetməsi strategiyalarını tətbiq edə bilməkdən keçir. Proqramımız məhz bu bacarıqları inkişaf etdirməyə yönəlib. Nəticədə iştirakçılar emosional yüklü münaqişə anlarında belə soyuqqanlılığını qoruyaraq, həll yönümlü düşünməyi və problemi konstruktiv şəkildə müzakirə edib uğurla nəticələndirməyi bacaracaqlar.

Proqram vasitəsilə şirkətin iştirakçıları münaqişələrin səbəblərini və növlərini anlayacaq, onları həll etmək üçün mümkün və məqsədəuyğun üslubları öyrənəcəklər. Təlim yüksək dərəcədə praktikaya əsaslanır və iştirakçılara münaqişələrin idarə olunmasına dair müxtəlif alətlər, texnikalar və nəzəriyyələr təqdim edir. Bu biliklər real situasiyalar və praktiki tapşırıqlar vasitəsilə mənimsənilir. Nəticədə münaqişələrin idarə olunması əməkdaşlıq qabiliyyətini gücləndirən və məmnuniyyət yaradan səmərəli bir vasitəyə çevrilir.

Təlimin məqsədi

• münaqişənin nə olduğunun, onun yaranma səbəblərinin və üstünlüyə çevrilməsi imkanlarının müəyyənləşdirilməsi
• münaqişənin səviyyəsinin təyin olunması və gərginliyin artmasının qarşısının alınması
• uyğun münaqişə idarəetmə üslubunun tətbiq olunması
• problemin müzakirəsindən əvvəl, müzakirə zamanı və sonra münaqişələrin idarə olunması texnikalarının tətbiqi
• münaqişələrə daha az vaxt və resurs sərf olunması, həmkarlarla daha məhsuldar münasibətlərin qurulması

Mövzular

• münaqişə növlərinin araşdırılması
• ön mühakimə və stereotiplərlə bağlı vəziyyətlərin idarə olunması
• münaqişənin həlli üslublarının (thomas-kilmann modeli əsasında) öyrənilməsi
• münaqişələrin həllində özünəinamlı davranışdan istifadə olunması
• problemin müzakirəsi üçün strukturlaşdırılmış söhbətlərin aparılması
• konkret situasiyalara əsaslanan praktik tapşırıqların yerinə yetirilməsi